Mabel Lozano
Zuzendaria, aktoresa eta gidoigilea
Mabel Lozano (Toledo, 1967) ikus-entzunezkoen alorrean aritzen da 2006az geroztik. Urte horretan bertan Mafalda Entertainment ekoiztetxea sortu zuen, giza eskubideekin eta emakumeen eskubideekin konprometitutako proiektuak bultzatzeko. 2017an El proxeneta izeneko lehen liburua argitaratu zuen, Espainiako sexu-esplotazioaren arduradunei buruzkoa; lan horretatik sortu zen El proxeneta. Paso corto, mala leche (2018) dokumentala.
Biografía del cadáver de una mujer (2020) film laburrak beste urrats bat eman zuen prostituzioa eta emakume askok errealitate hori atzean uztean pairatzen duten babesgabetasuna salatzeko bidean, eta 2021ean Film Labur Dokumental Onenaren Goya saria jaso zuen. Bere filmografian Ava bezalako lanak ere badaude, betiere giza eskubideen defentsarekin eta gizarte-sentsibilizazioarekin estuki lotutako ibilbide baten barruan.
2023an Pilar Bardem – Zinema, Laguntza eta Elkartasuna saria jaso zuen. Sari horren bidez, Espainiako Arte eta Zientzia Zinematografikoen Akademiak zinemaren arloko profesionalen ekintza solidarioak eta balio humanitarioak aitortzen ditu.