Ana Díez

Ana Díez (Tutera, 1957) zinema-zuzendaria eta gidoilaria da. Mexikoko Centro de Capacitación Cinematográfica ikastegian Zuzendaritza Zinematografikoa ikasi ondoren, Elvira Luz Cruz: pena máxima (1985) dokumentalarekin hasi zuen bere ibilbidea, Dana Rotbergekin batera zuzenduta eta Ariel saria irabazi zuena. Euskadira itzulita, zuzendari laguntzaile aritu zen, besteak beste, Ehun metro (Alfonso Ungría, 1986) eta 27 horas (Montxo Armendáriz, 1986) filmetan.

1988an Ander eta Yul zuzendu zuen, bere lehen film luzea, Donostiako Zinemaldian estreinatua. Film horrek laurogeiko hamarkadaren amaierako Euskadiri begiratzen dio, drogekin eta indarkeria politikoarekin topo egiten duten bi lagun ohiren arteko harremanaren bidez. Zuzendari berri onenaren Goya saria jaso zuen, eta, gainera, euskal zinema-industriako fikziozko film luze bat zuzendu zuen lehen emakumea bihurtu zen.

Ondorengo filmografian fikzioa eta dokumentala uztartu ditu, besteak beste, Todo está oscuro (1997), La mafia en La Habana (2000), Algunas chicas doblan las piernas cuando hablan (2001), Galíndez (2002), Paisito (2008) eta A quien cierra los ojos (2022) lanekin. Bere zinemak arreta berezia eskaintzen die historiari eta haren ondorioei norbanakoen bizitzetan, eta indarkeria, memoria, deserriratzea eta gatazka sozialak ikuspegi intimo eta dogmatismotik urrunetik lantzen ditu. 2026an, Ander eta Yul 4K-n zaharberritu dute Euskadiko Filmategiak eta EITBk, laurogeiko hamarkadako euskal zinemaren funtsezko lanetako bat gaur egunera ekarriz.